بعدما كان الهدوء سائد في لارجاء.... انهمرت اصوات العواصف تزمجر من بعيد.. زوابع غضب بدأت في النهوض... واعاصير كره أحييت من جديد....." لينا:انا موافقة(كلمة بسيطة نطقات بيها ماكانتش متوقعة غادي تحل عليها بيبان الجحيم من كل جانب..كلمة "موافقة"كتبان كلمة عادية ومعناها واضح ولكين الشي لي وراها غادي يقلب ليها حياتها كلها..سمعت صوت تزغريت ملا لمكان رفعات عينيها فيهم شافتهم كيسلمو عليها بلوجه ويباركو ليها... مروى:(فرحانة من قلبها ..توجهات لعندها تبوسها بعدما سبقات زغاريت)مبروك احبيبة..الله يكمل بلخير.. هبة:(جرات رجليها لعندهم وسلمات عليها فرحتها ماقدراش تخبيها واخيرا جا نهار لي تفرح بولدها غير مدركة لخطورة الوضع لي رمات فيه لينا..)الله يكمل بلخير ابنتي..من اليوم نتي وحدة منا..(شافت فمروى وجهات ليها امر تعطيها خاتم لخطوبة.. سمعو صوتها كتهضر بحقد خفي ماقدراش تبينو قدامهم) هنية:(رفعت حاجبها ونطقات) ولكين هاد الخطبة بلا شوار ولدي ماتقدرش تكمل..(رجعت نطقت بكره) مصطفى راجل الدار ومايمكنش نعطو لكلمة بلا شواروو. هبة:(دغيا فهماتها وفهمات قصدها ..هضرات بحدة ورمات كلامها ليها) هبة:اه ماشي مشكيل نشدو رأي ديالو..ولكين غادي يكون خدام دابا ياك؟؟ هنية:(صرطات ريقها ودوزات على رقبتها بتوتر ..فهماتها طايرة وعرفت لقصد من كلامها..مستحيل تفرط فخدمة ولدها على قبل لينا..ياك هيا لي كانت تقول خاصها تغبرها من هنا؟ايوة هاهو القدر عطاها فرصة ثمينة تفك منها ومن وحايلها.. نطقت بتوتر مع بسمة مصطنعة) هنية:لا ..متفهمينيش غلط..غير حيت مصطفى كيبغي لي يشد رأيو ولكين هادشي مايعنيش بلي ماموافقينش..حنا يشرفنا يكون النسب بيناتنا(ضحكت مصطنعة ترسمات على فمها مخبية وراها بزاف ديال لمكر) هبة:(رجعت شافت فمروى لي مدات ليها لخاتم وركبوه فيد لينا..مزال مامستوعباش الشي لي داير بيها..علاش توافق على زواج ممعروفش مولاه شكون؟كيدارت حتا خرجات كلمة موافقة من فمها وهيا لحد ساعة ماعرفاش الراجل لي غادي يتزوج بيه شكون؟علاش مجاش!!كيغادوز هاد الخطبة بلا خطيب؟؟واش مصطي واش شارف واش شي واحد عندو شي مشكل وبغاو يلصقوه فيها؟؟صرطات ريقها بخوف..ودوزت يدها على جبينها من تحت خمارها كتمسح قطرات صغيرة فجبهتها...علاش رمات راسها فهاد الوضع بلا تفكير عميق وبلا ماتشد وقتها على خاطرها برفض او لموافقة ) (وقف قدام لمرايا كيلبس ساعتو.. مطلع حاجبو وكيرمق نفسو بعدم اهتمام..رشات خفيفة من عطرو الخاص..عطات ريحتو فالمكان..رمق بهدوء تيلي ديالو..وجر رجليه لناحية الباب..نزل بثقالة مع دروج..وسمع صوتها نطقات من الصالة الجانبية: الخادمة:ميستر.. جناح لالة حورية واجد..خاصك حاجة اوخرى! بيبرس:(نطق ببطء)مزيان..(هضر بلغة أمرة)بلغي لبقية يوجدو راسهم لاستقبالها....(وصل لعندها ونطق)واخا نكون انا ماشي هنا...لي قالت ولي بغات ولي حبت ينفذ ..واضح؟؟ خادمة:(حدرات راسها ونطقات)واااضح بيبرس:(رمقها على جنب ونصارف من امامها..طلع فسيارتو..وتوجه للمطار وهو فأوج الحماس لاستقبالها...اكثر من 3 اشهر غايبة عليه..ختارت تقوم بعمرة..وتقضي عطلة بينية فسعودية..صوت روايض توقفو امام لمساحة الشاسعة لنزول الطائرة...عينيه كيراقبو..الطائرة لي بدات تنزل على مهل..دقائق بسيطة وشافها نازلة..توجه لعندها ولفرحة باينة على وجهو..مضيفات تابعينها وهي نازلة على اقل من مهلها..مرأة فستين من عمرها..علامات الوقار بادية على محياها..لباسها لابيض المستور..زادها وقار وحشمة ...نزلات كترمي ليه بسمة من بعيد..تسبيح فيدها وهازة عبايتها لبيضة بيدها لاوخرى...واخيرا وصلات لعندو...شافتو شد بيدها كيعاونها تحط رجليها على لارض..باسلها يدها وجبينها ونطق بصوت حنين...قليل فيين ينطق ويكون بهاد لين والحنية: بيبرس:(كيبوس راسها)توحشتك الحاجة... دادا حورية:(تبسمات من قلبها ونطقات )حتا انا اولدي..توحشتك بزاف (دخلات فصدرو معنقاه ورجعت شافت فيه كتنطق بفخر وكبرياء)الشوفة فيك اولدي تخلي لواحد يحس بلأمان.(كتشوف فراسها)شوف فين واصلة ليك..!! بيبرس:(ضحك من قلبو وضمها لعندو..راسها واصل لنصفو.. نطق بعطف كبير)لأمان هو لي حاس بيه انا دابا فاش شفتك.. دادا حورية:(تبسمات ليه من جديد..وجرات رجليها وهيا حاضناه..متوجهين لوطو..حطو لميضفات لبگاج ديالها فلكوفر.. وتوجهات تركب جنبو...طريق كلها وهيا تعاود عليه على زيارة ديالها وبيت الله الحرام..ولبلايص لي مشات ليهم وشنو شافت وشنو شرات..وهو مشاركها فالحديث وكيهضر بكل حب وحنان كبير وضحكة مرسومة على فمو..لي شافو هكا مايقولش هادا بيبرس المعروف بطابع المظلم لي مامفهومش..شنو السر لي فحورية حتا خلاتو يخرج هاد لكمية لكبيرة ديال الحب غير ليها بوحدها...سمع صوتها نطقات كإستفسار: حورية:فين هبة ومروى علاش ماجاوش معاك ؟

تتمة البارت