(كتحس بيه بدا يفيقها كما العادة...شنفات بفمها وغمضات عويناتها مزال فيها النعاس..ليل كولو وهيا سهرانة مع حبل افكارها لي مقدرش يتقطع...سمعت صوتها كدق عليها بجهد حتا قفزات...ماشي من عوايدهم يفيقو هاد لوقت... سمية:بنت فاطنة!!!! لينا:(تأفأفت بضجر)شنو بغيتي ؟ سمية:قالت ليك مي نوضي توجدي راسك..الناس غادي يجو من هنا لساعة لينا:(مسحات وجها بيدها ونطقات ببطء)واخا.. سمية:(جات تمشي وهيا ترجع السم لي فيها خاصها تخرجو وترتاح..كتهضر من ورا لباب)ماسولتي راسك كيغايدوز هاد الزواج بلا عريس!!!باينة رماوك لشي مصطي...والى ماكانش مصطي شي شارف خارجة كرشو وصلعتو تزلق لمشاش ههه(ضحكات بسخرية وخلاتها كتصرط ريقها...يمكن كلام سمية بصح؟كيغايدوز هاد لعرس بلا عريس..شنو زعمة غادي تسني بوحدها!!حركات راسها كتنفض من لوساويس وافكارها لي مقدروش يساليو..وجهات رجليها لحمام رتبات نفسها..وقاضات حالتها..ونزلات وميشو تابعها..كل درجة كتبقى فيها شحال افكارها مشتين خايفة لاتكون رمات نفسها فالنار....شافتهم جالسين يفطرو... هنية:(هضرات بكره)جلسي تفطري لينا:(بعدم اهتمام)مافياش... اسماء:من دابا بديتي تنفخي..فطورنا مابقاش عاجبك؟ لينا:(طلعت حاجبها فيها)ديها فراسك.. اسماء:هاااي هااااي هااااي..حتا هيا تحل ليها الفم...شتي دهب بديتي تقاقي...(بإستغراب) لينا:انا بعدا جاني دهب كيت لي ماعندو مايكسااب(وتقول واش تبقى فيها..خاصها ترد جوابها وترتاح) سمية:(ناضت من مكانها صاعرة حالفة فيها تنتفها ودافع على ختها)مزيان تبارك الله..ياك مايصحابليك راسك قطعتي لواد ونشفو رجليك...راه تكوني هنا تكوني لهيه نحرو عليك لعيشة... لينا:(قربات منها)هانا ليك...قربي ليا تشوفي... سمية:(يلاه جات ترمى عليها هيا وختها سمعو صوتها نطقات بحر جهدها كانت جالسة تسمع لنگيرهم وراسها كيتبخ)اسكتو يعطيكم لقوى... واش مكتقضاوش... سمية:راه امي هيا لي.. هنية:(قاطعتها)سكتي...زيدي بركي.. وحتا نتي اسماء جلسي..(شافت فلينا)سيري دخلي نتي لبيت لبسي من الشي لي جابوليك دابا يجيو.. لينا:(رمقاتهم بنظرة غير مفهومة وجرات رجليها لبيت هنية لي كانو فيه طيافر ولهدايا لي جاوها..يلاه غادي تشوف الشي لي جاها.. كتشوف تواب وصيكان وصنادل محطوطين وحدة تنسيك فلوخرى..قفاطن وتكاشط بالوان نادرة وتصاميم مختلفة...عروسة بيبرس واجرك على الله تلبس لي عمر شي وحدة لبساتو هبة كبرات بيها..نهار لكبير عندها تزوجو فاكيد ماغاديش تبخل على مرات ولدها...جرات قفطان فلبيض مع صندالة ميني طالون.. حلات طيفور اخر جرات منو بوشيط ديال لمكياج داكشي باينة فيه غالي ومن بلاصتو مابخلوش عليها بحتى حاجة ا ومنساو والو كلشي تختار ليها بعناية كبيرة محقروش ضعفها من جهة عائلتها وقالو هادي يتيمة نجيبو ليها شياطة ونعطوها ولدنا..بحال بزاف ديال ناس يسمعو يتيمة يحقرو ضعفها ويقلو منها عند بالهم بلي عطاوها الفرعون ديالهم لي هو ولدهم...وقفات قدام لماريا وبدات تماكي ماكتعرفش ليه عمرها كسابت شي مكياج ..داكشي لي كيرمو بنات هنية من لمكياج البيريمي تشدو لينا عندها...ومايقدر حد يلومها انوثتها تحكر عليها يكون عندها لعند لبنات كلهم.. كتحاول ترسم عينيها معرفاتش...ختارت تحط كلوز وشوية ماسكارا هادا حدهافالمكياج سطاج لوحش لاخر ماعندها جهد ليه...حلات شعرها دهبي على طولتو وخلاتو يضرب قفاها..هزات شوية منو لفوق وخرجات جوج زغيبات على كل جنب..لبسات قفطانها وصندالة...وحطات من الاكسسوارات لي جاوهاها سلسلة من دايموند زينات عنقها وبراسلي ديالها فيدها..رجعت كتشوف الخاتم لي فصبعها ..وقلبها بدا يضرب خصوصا فاش سمعات صوتهم جاو..جلسات فوق ناموسية...والرجفة مالية داتها...ياك مايكون الشي لي قالت سمية صحيح وغادي ترمي راسها لشي واحد مصطي..غمضات عينيها بخوف وتوتر شديد وسمعات صوتها حلات عليها لباب: هنية:(شافت فيها وصرطات ريقها اول مرة تشوفها بهاد الحطة موالفة تشوفها مضاربة مع جلايلها..هضرات بحسد) خرجي..لعدول جا... (كيتكسل فوق سداري..جر يدو لجهة تيلي شاف الساعة.. كانت 12:15 ماشي موالفة ليه يفيق هاد لوقت..1/2 هادا هو وقتو.. ولكين ماشدش راحتو فالنعسة ..متحلاش ليه النعسة غير فبيتو.. كيسمع صوت ايمان كتوشوش مع مها قريبين منو..حط يديه فوق سداري جا ينوض ختار يجلس خصوصا فاش سمع لموضوع كيخص عائلتو.. إبمان:على ماقالت ليا سمية ماخلاو ماجابو سعدية:(كتعجن حداها)وراه النسا كلشي كيهضر على الشي لي جا لهنية... ايمان:واييه امي..قالت ليا سمية جابو ليها 10/10من الحاجة خلي دهب ولالماس... هنية:وشكون من لبنات لي تخطبات؟ ايمان:(هضرات بشوية)امي تبقى بيني وبينك سمية وصاتني هادشي لي غادي نقول ليك مايسمعو حد سعدية:(ساست ايديها من لعجينة وشافت فيها بفضول )هضري كنسمع؟ إيمان:جاو فلينا امي..واليوم عندهم ضريب الصداق..وفلعشية غادي تمشي معاهم

تتمة البارت